प्रभु बैंकद्वारा आधारहीन र भ्रामक समाचारप्रति गम्भीर ध्यानाकर्षण

बैंकले कर्मचारी सरुवा, कार्य जिम्मेवारीमा समायोजन, कर्जा असुली तथा धितो लिलामीसम्बन्धी सूचना प्रकाशनजस्ता कार्यहरू प्रचलित कानुन र संस्थागत अभ्यासअनुसार नै नियमित रूपमा सञ्चालन हुँदै आएको स्पष्ट पारेको छ । कुनै पनि आधार प्रमाण वा आधिकारिक पुष्टि बिना यस्ता नियमित प्रक्रियालाई लिएर समाचार सम्प्रेषण गर्नु व्यावसायिक आचारसंहिता अनुकूल नहुने बैंकको ठहर छ ।

विगतमा केही कर्जा फाइलसँग सम्बन्धित विषयहरू अधिकारप्राप्त निकायमा अनुसन्धान भई हाल अदालतमा विचाराधीन रहेको अवस्थामा बैंकले कानुन र नेपाल राष्ट्र बैंकका नियामकीय प्रावधानहरूको पूर्ण पालना गर्दै जोखिम व्यवस्थापन तथा आन्तरिक नियन्त्रणलाई प्रभावकारी बनाउँदै आएको जनाएको छ । साथै, बैंकका सम्पूर्ण निर्णयहरू नियामकीय मापदण्डबमोजिम नै हुँदै आएको र आगामी दिनमा पनि सोहीअनुरूप सञ्चालन हुने प्रतिबद्धता व्यक्त गरिएको छ ।

अनुमान, अपुष्ट स्रोत वा एकपक्षीय सूचनाका आधारमा समाचार सम्प्रेषण गर्दा बैंकको संस्थागत प्रतिष्ठा, सार्वजनिक विश्वास र समग्र वित्तीय प्रणालीमै नकारात्मक असर पर्न सक्ने बैंकको भनाइ छ । यसप्रकारका भ्रामक सामग्रीले अनावश्यक भ्रम सिर्जना गर्ने दुष्प्रयास भएको उल्लेख गर्दै बैंकले आगामी दिनमा उच्च व्यावसायिक संवेदनशीलता र तथ्यपरकता अपनाउन सञ्चारमाध्यमहरूसँग आग्रह गरेको छ ।

प्रेस तथा अभिव्यक्ति स्वतन्त्रताको पूर्ण सम्मान गर्ने जनाउँदै प्रभु बैंकले आफ्ना निक्षेपकर्ता, कर्जाग्राही, सेयरधनी तथा सम्पूर्ण सरोकारवालाको हित प्रवर्द्धन गर्न प्रतिबद्ध रहेको बताएको छ । साथै, बैंकसम्बन्धी कुनै पनि समाचार प्रकाशन गर्नुअघि आधिकारिक सूचना र विश्वसनीय स्रोतलाई मात्र आधार बनाउन सबैमा हार्दिक अनुरोध गरिएको छ ।