सेबोनले अध्यक्ष पाउने मिति अनिश्चित बन्दै, महान्यायाधिवक्ताको राय अर्थ मन्त्रालयमा

अब प्रक्रिया नै रद्द भएर नयाँ सुरु गर्ने सम्भावना पनि बढेको छ । सरकारले सेवोनको अध्यक्षमा नाम सिफारिस गर्नका लागि गत माघ पहिलो साता राष्ट्रि योजना आयोगका उपाध्यक्ष डा. मीन बहादुर श्रेष्ठको संयोजकत्वमा ३ सदस्यीय समिति गठन गरेको थियो । समितिमा अर्थ सविच मधुकुमार मरासिनी र उदय निरौला सदस्य रहेका छन् । समितिले सेवोनको अध्यक्षका लागि आवेदन दिएका १९ जनामध्येबाट ५ जना सर्टलिस्ट गरी असार २ गते २ जनाको अन्तर्वार्ता लिएको थियो । सन्तोष नारायण श्रेष्ठ र मुक्तिनाथ श्रेष्ठले त्यसै दिन अन्तर्वार्ता अघि कार्ययोजना प्रस्तुत गरेका थिए । तीन जना भने अनुपस्थित भएका थिए ।

समितिले गयल भएका कृष्ण बहादुर कार्की, डा. नवराज अधिकारी र चिरन्जीवी चापागाईका लागि कार्ययोजना प्रस्तुत गर्न र अन्तर्वार्ता प्रयोजनका लागि असार ५ गते मिति तय गरेको थियो । तर, उनीहरु तीनै जना दोस्रो पटक पनि अनुपस्थित भएका थिए ।