ललितपुरमा सगरमाथा चौधरी आँखा अस्पतालको आँखा शिविर, ९० जनाको निःशुल्क शल्यक्रिया

वैशाख १९ गतेदेखि २१ गतेसम्म चलेको शिविरमा कुल ८१५ जनाको आँखा परिक्षण गरिएको थियो भने मोतिबिन्दु देखिएका ९० जना बिरामीहरुको निःशुल्क शल्यक्रिया समेत गरिएको छ ।

सगरमाथा चौधरी आँखा अस्पतालका बाह्य कार्यक्रम प्रमुख राजकुमार यादवका अनुसार शिविरमा ४५६ जना आँखाका विरामीहरुलाई चस्मा र ५१२ जनालाई औषधी समेत निःशुल्क वितरण गरिएको छ ।

अस्पतालका चिफ मेडिकल डाइरेक्टर डा.संजय कुमार सिंहको नेतृत्वमा रहेको स्वास्थ्यकर्मीहरुको टोलीले शिविरमा आँखा उपचार सेवा प्रवाह गरेको थियो ।

संघ अन्तर्गत देशभरमा २८ आँखा अस्पताल, १५६ आँखा उपचार केन्द्र तथा ४३ जिल्ला शाखाहरू सञ्चालनमा छन् । स्थापनादेखि हालसम्म सङ्घको सञ्जालमार्फत नेपाली नागरिक तथा अन्य विभिन्न देशका नागरिकहरू गरी कुल चार करोड ३६ लाख २६ जना आँखाका बिरामीहरूलाई आँखा उपचार सेवा प्रवाह गरिसकेको छ भने ५१ लाख ३३ हजार ६५९ जनाको आँखाको शल्यक्रिया भइसकेको छ ।