यि चार प्रदेशका तराईमा भारी वर्षाको चेतावनी, सतर्क रहन आग्रह

महाशाखाका अनुसार, मनसुनको न्यून चापीय रेखा औसत स्थानभन्दा केही उत्तरतर्फ सरेकाले मनसुनी गतिविधि बढेको हो। हाल कोशी र बागमती प्रदेशका केही स्थानमा हल्कादेखि मध्यम वर्षा भइरहेको छ।

आज दिउँसो देशभर सामान्यतया बदली रही सबै प्रदेशका अधिकांश स्थानमा चट्याङसहित हल्कादेखि मध्यम वर्षाको सम्भावना छ। विशेषगरी कोशी, लुम्बिनी र सुदूरपश्चिम प्रदेशका तराई भूभागका एक-दुई स्थानमा भारी वर्षासमेत हुनसक्ने पूर्वानुमान गरिएको छ।

यस्तै, आज राति पनि मौसममा सुधार हुने देखिँदैन। राति कोशी, मधेस, बागमती र गण्डकी प्रदेशका साथै अन्य प्रदेशका तराई भूभागका धेरै स्थानहरूमा चट्याङसहित मध्यम वर्षा जारी रहनेछ। पहाडी भूभागका केही स्थानमा पनि वर्षाको सम्भावना रहेको महाशाखाले जनाएको छ। राति कोशी, मधेस, लुम्बिनी र सुदूरपश्चिम प्रदेशका तराईका एक–दुई स्थानमा भारी वर्षाको सम्भावना छ।

भारी वर्षाका कारण नदीको जलस्तर बढ्ने, बाढी, पहिरो तथा डुबानको जोखिम रहने भएकाले सम्बन्धित क्षेत्रका बासिन्दालाई आवश्यक सावधानी अपनाउन महाशाखाले विशेष आग्रह गरेको छ। साथै, सडक तथा हवाई यातायातमा समेत वर्षाका कारण सामान्य अवरोध आउन सक्ने भएकाले यात्रा गर्दा मौसमको अवस्थाबारे जानकारी लिएर मात्रै अघि बढ्न सुझाइएको छ।