देशभर गर्मी ह्वात्तै बढ्दै, सतर्कता अपनाउन अनुरोध

कोशी र गण्डकी प्रदेशको पहाडी भू-भागमा आंशिक बदली देखिए पनि अन्य अधिकांश क्षेत्रको मौसम सामान्यतः सफा रहेको मौसम पूर्वानुमान महाशाखाले जनाएको छ ।

महाशाखाका अनुसार आगामी दिनहरूमा देशभर तापक्रम अझै बढ्ने अनुमान गरिएको छ । विशेष गरी मध्य र पश्चिमी तराईका जिल्लाहरूमा अत्यधिक गर्मीको सम्भावना रहेकाले स्थानीय बासिन्दालाई आवश्यक सतर्कता अपनाउन आग्रह गरिएको छ ।  त्यस्तै, कोशी र गण्डकी प्रदेशको पहाडी क्षेत्रमा एक-दुई स्थानमा मेघगर्जन र चट्याङको सम्भावना रहेकोले सुरक्षित रहन, खुला स्थानमा नबस्न, विद्युतीय उपकरणहरूको प्रयोगमा सावधानी अपनाउन र मौसम अनुसार योजना बनाउन समेत अनुरोध गरिएको छ ।

सुझावहरू:

अत्यधिक गर्मीबाट बच्न पर्याप्त पानी पिउने ।

बिहान वा साँझको समयमा मात्र घरबाहिर निस्कने ।

कृषकहरूले खेतीपातीमा सम्भावित असरको पूर्वतयारी गर्नुपर्ने ।

मौसमको बदलिँदो स्वरूपलाई ध्यानमा राख्दै महाशाखाले नागरिकहरूलाई सचेत रहन र आधिकारिक स्रोतबाट प्राप्त सूचना अनुसार मात्रै कदम चाल्न सुझाव दिएको छ ।