हिमालयन बैंकको एफपीओ पर्ने संभावना न्यून, ४.४२ गुणा बढीको आवेदन

बैंकले प्रतिकित्ता १५७ रुपैयाँका दरले ९२ लाख ५० हजार ४६९ कित्ता शेयर निष्कासन तथा बिक्री खुला गरेको थियो। सीडीएस एण्ड क्लियरिङ लिमिटेडका अनुसार यसमा ४ करोड ९ लाख ६६ हजार ५०० कित्ता शेयरका लागि आवेदन परेको छ, जसमा १७ लाख ८६ हजार ७८२ जनाले आवेदन दिएका छन्। आवेदनको संख्या अझै बढ्नेछ । 

बैंकले संस्थापक र सर्वसाधारण शेयरधनीको शेयर अनुपात ७०:३० कायम गर्न एफपीओ निष्कासन गरेको हो। हाल बैंकको कुल चुक्ता पुँजी २१ अर्ब ६५ करोड ६६ लाख १५ हजार ६३१ रुपैयाँ रहेको छ। जसमध्ये ७२.९९ प्रतिशत हिस्सा संस्थापक समूहको र २७.०१ प्रतिशत हिस्सा सर्वसाधारणको रहेको छ। एफपीओ निष्कासनसँगै सर्वसाधारण समूहको हिस्सा ३० प्रतिशत पुग्नेछ ।

बैंकले कुल १ अर्ब ४५ करोड २३ लाख रुपैयाँ बराबरको एफपीओ जारी गरेको हो। यसमा बिक्री प्रबन्धकको रूपमा सिटिजन्स क्यापिटल लिमिटेड रहेको छ ।