पाँच जिल्ला जोड्ने सिद्धिचरण लोकमार्ग विस्तार योजना कछुवा गतिमा भएको कामले सबै आक्रोसित

उदयपुर समेत ५ जिल्लाको भविष्यसँग जोडिएको वा हिमाल पहाडदेखि मधेश जोड्ने यो सडक योजनाको कार्यालय संचालन भएको दुई वर्ष भए पनि काम भने कछुवा गतिमा रहेको र नेपाल सरकारले बजेटको उचित व्यवस्थापन नगरेको कारण काममा सुस्तता भएको बताइएको छ ।

मिर्चेयाबाट कटारी पुग्न जम्मा २७ किलोमिटर रहेको तर बसमा यात्रा गर्दा दुईघण्टाभन्दा बढी समय लाग्ने गरेको छ भने सडक भत्किएर खाल्डाखुल्डी बनेको छ । वर्षाका समयमा गाडी दुर्घटना हुनुका साथै फसेर सास्ती हुने गरेको भए पनि मर्मत संभारमा बेवास्ता भएको सरोकारवालाहरुले बताएका छन् ।

तर कटारी बजारका व्यापारीहरुले भने कटारी बजारभित्र सडक विस्तार गर्दा यहाँका व्यापारीहरु पलायन हुन सक्ने भन्दै कटारी नगरपालिकालाई १ापनपत्र बुझाएर चेतावनी दिएका छन् ।

उदयपुर उद्योग वाणिज्य संघ कटारीले एक विज्ञप्ती निकालेर कटारी नगरपालिकाका मेयर राजेशचन्द्र श्रेष्ठलाई बुझाउँदै कटारी नगरपालिकाभित्रको सडक विस्तार गर्दा व्यापारीहरु विस्थापित हुने जानकारी दिंदै सडक फराकिलो पार्ने विषयमा स्थानीय सरकारको धारणा माग गरेका छन् ।उदयपुर उद्योग वाणिज्य संघका उपाध्यक्ष अरुण कुमार साहद्धारा जारी विज्ञप्तीमा सडकको क्षेत्र कति मिटर हो ? त्यस बारेमा जानकारी नहुँदा बैंकको कारोबारमा, बेचबिखन तथा अन्य कारोबारमा समेत अन्यौल भएकोले समाधानको बाटो पहिल्याउन भनिएको छ ।

स्थानीय व्यापारीहरुले कटारी बजारभित्र हाल कायम रहेको सडक नै कायम गरेर काम शुरु गर्न भनेकोले सडकको मापदण्ड अनुरुप २ लेनको सडक बनाउँदा धेरैको घर भत्किने भएकोले घर नभत्काउनकालागि नगरपालिकालाई ज्ञापन पत्र बुझाएको बुझिएको छ ।

हाल कायम रहेको सडकलाई नै कायम गरेर मर्मत सुधारको काम अघि बढाउँदा सबैलाई सहज हुने र व्यापारीहरुले घर भत्काउन नपर्ने बताएका छन् ।

यो सडकको स्तरोन्नतिकालागि उदयपुर निर्वाचन क्षेत्र नं २ का माननीय साँसद अम्बर बहादुर रायमाझीले पनि आफ्नो तर्फबाट प्राथमिकतामा राखेर सक्दो प्रयास भएको र सडक विभाग, भौतिक पूर्वाधार तथा यातायात व्यवस्था मन्त्रालयसँग समन्वय गरेर बजेट विनियोजनकालागि प्रयास गरिरहेको बताउनु भएको छ ।

यस विषयमा मिर्चैया कटारी घुर्मी सडक योजनाका प्रमुख डिई संजय मिश्रले भने पहिले यो सडक लाहान सडक डिभिजनले हेर्ने गरेकोले पहिलेको ठेक्काको काम भैरहेको जानकारी दिंदै घुर्मीबाट कटारीतिर आउने करीब सात किलोमिटरमा सडक ग्राभेल गरेर कालोपत्रे गर्ने तयारी भैरहेको बताए ।

डिई मिश्रले लाहानले पहिले लगाएको ठेक्काको काम भैरहेको छ तर मिर्चेया कटारी घुर्मी सडक योजनाका नाममा बजेट प्राप्त नभएको जानकारी दिंदै हाल सडकको चौडाई साढे पाँच मिटरमात्र रहेकोमा योजनाले नाला सहित १५ मिटर कायम गरेर विस्तार गर्ने र सडक दुई लेनको बनाउने योजना रहेको बताए ।

मिर्चैयाबाट घुर्मी सम्मको दुरी जम्मा ७२ किलोमिटर रहेको र मिर्चेया कटारी २७ किलोमिटर छ । कटारीबाट घुर्मीसम्मको ४५ किलोमिटरमा ठेक्का लगाउने प्रक्रिया अघि बढेको छ भने सडक कालोपत्रे साढेसात मिटर चौडाईमा हुने र १५ मिटरको सडक चौडाईमा विचबाट साढे सात साढे सात लिएर सडक बनाउने डिई मिश्रले बताए ।

कटारी नगरपालिकाको क्षेत्र सिन्धुली, उदयपुर, ओखलढुङ्गा र केही पर खोटाङ जिल्लाको सीमासम्म पर्ने भएकोले त्यहाँका सथानीयको मुख्य बजार कटारी रहेको हुँदा यहाँका मानिसको जनजीविकासँग जोडिएको विषय भएकोले पनि सडक छिटो मर्मत संभार तथा निर्माण गर्न स्थानीयहरुले माग गरेको बताइएको छ ।

अर्कोतर्फ घुर्मी बजार सीमावर्ती बजार भएकोले त्यहाँको व्यापार व्यवसायमा असर नपरोस् भन्ने उद्देश्यले र कटारी बजारको भविष्यमा आघात नपुगोस् भनेर पनि व्यापारीहरुले सडक विस्तार गर्दा हाल कायम भएको सडकको चौडाईलाई नै कायम गरेर काम गर्न नगरपालिकासँग अनुरोध गरिएको कटारीका स्थानीय व्यवसायीहरुले बताएका छन् ।

तर कटारीका कतिपय व्यापारीहरुले भने कटारी बजारलाई सुन्दर बनाउन वा सौन्दर्यीकरण गर्नकालागि सडक विस्तार गरेर बजारलाई अझ फराकिलो र व्यवस्थित बनाउँदा बजारको गरिमा र महत्व बढ्नुका साथै कटारी उदयपुर जिल्लाकै सुन्दर बजारका रुपमा विकसित हुने बताएका छन् ।

(