सेयर बजारमा ठूला लगानीकर्ताको प्रवेश बढ्दै

काठमाडौं । पछिल्लो एक वर्षको अवधिमा १ करोड रुपैयाँभन्दा माथिको मार्जिन प्रकृतिको (सेयर धितो कर्जा) रकममा उल्लेख्य वृद्धि भएको छ । राष्ट्र बैंकको तथ्यांकलाई आधार मान्ने हो भने व्यक्तिका साथै संस्थागत लगानीकर्ताहरुले ठूलो मात्रामा सेयर धितो कर्जा लिएको बुझ्न सकिन्छ । चालु आर्थिक वर्षको माघसम्मको तथ्यांक अनुसार बैंक तथा वित्तीय संस्थाहरुबाट प्रवाहित १ करोडभन्दा माथिको सेयर कर्जा गत वर्षको सोही समयको तुलनामा ४६.१७ प्रतिशतले बढेको राष्ट्र बैंकले प्रकाशित गरेको रिपोर्टमा उल्लेख छ । माघ मसान्तसम्ममा प्रवाह भएको १ करोड रुपैयाँमाथिको सेयर कर्जा ७६ अर्ब ४० करोड १४ लाख रुपैयाँ पुगेको छ । गत वर्षको सोही अवधिमा भने बैंक–वित्तीय संस्थाले १ करोड माथिको सेयर कर्जा ५२ अर्ब २६ करोड ९५ लाख रुपैयाँ प्रवाह गरेका थिए । यो १ वर्षको अवधिमा १ करोडभन्दा माथिको सेयर धितो कर्जा २४ अर्ब १३ करोड २४ लाख रुपैयाँ थपिएको हो । यता, चालु आर्थिक वर्षको पहिलो ७ महिनाको अवधिमा मात्र १ करोड माथिको सेयर कर्जा ३६.६ प्रतिशत अर्थात २० अर्ब ४७ करोड १२ लाख रुपैयाँ थपिएको राष्ट्र बैंकको तथ्यांकले देखाउँछ । यता, माघ मसान्तसम्म आइपुग्दा बैंक–वित्तीय संस्थाहरुले समग्रमा १ खर्ब १५ अर्ब ११ करोड रुपैयाँ सेयर धितो कर्जा प्रवाह गरे गरेका छन् । यस आधारमा, कुल सेयर धितो कर्जामध्ये १ करोड माथिको कर्जाको हिस्सा ६६.३७ प्रतिशत रहेको देखिन्छ ।