शिखर इन्स्योरेन्सले १०० मेगावाटसम्मको हाइड्रो पावर र ५० मेगावाटसम्मको सोलार आयोजना बनाउने, आयोजना बेच्ने कम्पनीहरुले दस्तावेजसहित शिलबन्दी पेश गर्न सक्ने

कम्पनीले आरओआर, पीआरओआर, वा रिजर्भोएर खालको ३० मेगावाटदेखि १०० मेगावाट हाइड्रो आयोजना खोजेको हो। त्यस्तै १० मेगाबाटदेखि ५० मेगावाटसम्मको सोलार आयोजना खोजेको हो । कम्पनीले सोलार आयोजनाको हकमा जग्गा खरिद गरिसकेको वा लामो अवधिको लागि लिजमा लिएको वा लिन मिल्ने अवस्था भएको भनेको छ ।

हाइड्रोपावर तथा सोलार परियोजनाको हकमा परियोजनाको PPA सम्पन्न भइसकेको वा PPA सुनिश्चित भएको परियोजनालाई प्राथमिकतामा राखिने कम्पनीले जनाएको छ । उत्पादन अनुमतिपत्रको हकमा उत्पादन अनुमतिपत्र प्राप्त गरिसकेको वा प्रकृयामा गइसकेको हुनु पर्ने शर्त कम्पनीले राखेको छ ।

यी प्राविधिक मापदण्डमा पर्ने आयोजना भएका इच्छुक व्यक्ति वा संस्थाहरूले आफ्नो प्रस्तावित दस्तावेज शिखर इन्स्योरेन्स कम्पनी लिमिटेड वा हृवाइट लोटस पावर लिमिटेडको कार्यालयमा, कार्यालय समयभित्र शिलबन्दी रूपमा पेश गर्न सकिने कम्पनीले जनाएको छ। कम्पनीका अनुसार प्रस्तावित दस्तावेजमा आयोजनाले अहिलेसम्म प्राप्त गरेका सबै आवश्यक स्वीकृति तथा अनुमतिपत्रहरू, साथै हालको कार्यान्वयन स्थिति तथा प्रगतिबारे यथार्थ र विस्तृत विवरण समावेश गरिएको हुनुपर्नेछ । साथै, सबै कानूनी कागजातहरूको प्रतिलिपि पनि संलग्न गर्नुपर्नेछ । परियोजना कुनै किसिमको कानुनी विवाद वा समस्यामा नपरेको हुनुपर्नेछ ।

प्रस्तावित दस्तावेजहरू प्राप्त भए पश्चात, थप जानकारी लिन सम्बन्धित प्रस्तावदाता कम्पनीहरूलाई पूर्व सूचना दिइने कम्पनीले जनाएको छ। कुनै पनि प्रस्ताव कम्पनीको नीतिसँग मेल नखाएमा कम्पनीले त्यसलाई कारणसहित वा बिना कारण रद्द गर्न सक्ने कम्पनीले प्रष्ट पारेको छ।