उदयपुर सिमेन्ट उद्योगको बदमासी, ४५ करोड विद्युत महशुल तिरेन

उदयपुर । उदयपुरको जलजले स्थित उदयपुर सिमेन्ट उद्योगले नेपाल विद्युत प्राधिकरण उदयपुर शाखालाई विद्युत प्रयोग गरे वापतको कुल ४५ करोड भुक्तानी गर्न बाँकी रहेको नेपाल विद्युत प्राधिकरण उदयपुरले जनाएको छ । सिमेन्ट कारखानाले उदयपुर गाईघाट स्थित नेपाल विद्युत प्राधिकरणलाई सबैभन्दा बढी विद्युत महशुल तिर्दै आएको भए पनि उद्योगको आर्थिक अवस्था खस्कदै गएपछि महशुल बाँकी रहेको बताइएको छ ।

नेपाल विद्युत प्राधिकरण उदयपुर शाखाका प्रमुख ई. विजयबाबु खत्रीका अनुसार उदयपुरमा उदयपुर सिमेन्ट उद्योग र सडक बत्ती वापतको नगरपालिका तथा सम्बन्धित वडा कार्यालयसँग विद्युत महशुल असुल गर्न बाँकी रहेको छ । सिमेन्ट उद्योगसँग विद्युत महशुल वापतको ३६ करोड र २५ प्रतिशत जरिवाना गरी कुल ४५ करोड महशुल बाँकी रहेको छ । यसैगरी त्रियुगा नगरपालिकाको विभिन्न वडाहरुसँग पनि १ करोड भन्दा बढी विद्युत महशुल र जरिवाना २५ प्रतिशत थप गर्दा १ करोड २५लाख महशुल तिर्न बाँकी रहेको विद्युत प्रमुख ई. खत्रीले बताए ।

विद्युत महशुल असुलीकालागि उदयपुर सिमेन्ट उद्योगसँग पटक पटक ताकेता गरेको तर हालसम्म बुझाएको छैन र नगरपालिका तथा सम्बन्धित वडा कार्यालयमा पनि ताकेता भैरहेकोले महशुल असुल उपर गरिने प्रमुख खत्रीले बताए ।

विद्युत महशुल तिर्न बाँकी रहेको विषयमा उदयपुर सिमेन्ट उद्योगका निमित्त महाप्रबन्धक महेश प्रसाद साहसँग सम्पर्क गर्दा पहिले २४ करोड विद्युत महशुल तिर्न बाँकी रहेको थियो । पछि बढ्दै गएर ३६ करोड भएको बताए । उद्योगको आर्थिक अवस्था पहिलेको जस्तो गतिलो नभएकोले समयमा विद्युत महशुल तिर्न नसक्दा बाँकी रहन गएको र बाँकी विद्युत महशुल क्रमशः तिर्दै जाने योजना रहेको महाप्रबन्धक साहले बताए ।

विद्युत प्राधिकरण उदयपुरका प्रमुख ई.खत्रीले उदयपुरको कटारी र चौदण्डीगढी नपाको बेल्टारमा प्रशाखा कार्यालय खोलेर विद्युत महशुल संकलन गर्ने गरेको र ग्रामिण क्षेत्रका उपभोक्ताले ई सेवा वा अनलाइन मार्फत विद्युत महशुल भुक्तानी गर्ने गरेको जानकारी दिदै उदयपुरमा जम्मा ६० हजार ६३ ग्राहक रहेको बताए ।

उदयपुरको लिम्चुङबुङ गाउँपालिकाबाट विद्युत महशुल भुक्तानी गर्न आउँदा जाँदा तीन दिन लाग्ने र बसभाडा खानेखर्च हिसाब गर्दा विद्युत महशुल तिरेको भन्दा धेरै महंगो पर्ने भएकोले अनलाइन सेवाबाट पनि महशुल लिने गरिएको छ । जिल्लाका सात ठाउँमा विद्युत फ्यूज सेवा कार्यालय संचालन छ । जसमा त्रियुगा नपाको १५ नं वडा को रानीवास, १ नं वडाको जोगीदह, लिम्चुङबुङ गाउँपालिका, ताप्ली गाउँपालिका, रौतामाई गाउँपालिकाको मुर्कुची, बेलका नगरपालिकाको अम्बासी, उदयपुरगढी गाउँपालिकाको नेपालटारमा विद्युत फ्यूजसेवा कार्यालय स्थापना गरेर सेवा प्रदानगरिएको कार्यालय प्रमुख खत्रीले बताए ।

उदयपुर जिल्लाको ८ वटै स्थानीय निकायमा विद्युतीकरण भैसकेको र केही गाउँमा उदयपुर विद्युतीकरण आयोजना मार्फत पोल गाड्ने र तार जोड्ने काम भैरहेको जानकारी दिंदैँ उदयपुर विद्युत प्रमुख खत्रीले आउँदो फागुन महिनासम्ममा विद्युतीकरण हुन बाँकी रहेका सबै गाउँमा बत्ती बल्ने बताए । हालसम्म त्रियुगा नपामा सतप्रतिशत विद्युतीकरण भएको छ । कटारी नपामा ९६ प्रतिशत, उदयपुरगढी गाउँपालिकामा ९० प्रतिशत चौदण्डीगढी नपा र रौतामाई गापामा ८८ प्रतिशत,बेलका नपामा ८४ प्रतिशत, ताप्ली गापामा ८२ प्रतिशत र लिम्चुङबुङ गापामा ८१ प्रतिशत विद्युतीकरण भैसकेको उनले बताए ।

विद्युत प्राधिकरणको गाईघाटमा आफ्नो भवन नहुँदा काममा बाधा हुने गरेको छ । भाडाको भवनमा कार्यालय संचालन भएकोले बैठक बस्ने कोठाको अभाव छ भने गाडी पार्किङ गर्ने ठाउँ छैन । कार्यालय संचालनाकालागि समेत कोठा अपुग भएको भने आवासकालागि समेत समस्या भएको छ । गाईघाटमा विद्युत प्राधिकरणको कार्यालय २०६१ सालदेखि संचालनमा आएको र सोही समयदेखि भाडाको भवनमा कार्यालय संचालन भैरहेको छ । अहिले गाईघाटमा विद्युत प्राधिकरण जग्गा अधिग्रहण गर्ने प्रक्रियामा लागेको खत्रीले बताए ।

गत आर्थिक वर्षसम्ममा विद्युत महशुल वापत ४४ करोड असुल भएको जानकारी दिंदै प्रमुख खत्रीले उदयपुरको चौदण्डीगढी नगरपालिकाको बेल्टारमा आफ्नै जग्गामा भवन निर्माण गरी महशुल काउन्टर कार्यालय संचालन गरिएको छ । कटारीमा र रौतामाई गाउँपालिकाको १ नं वडाको माझखर्कमा जग्गा रहेको बताए ।