माण्डु हाइड्रोपावरको प्रिमियम आईपीओमा आवेदन दिने आज अन्तिम दिन

कम्पनीले भदौ ११ गतेबाट निश्कासन गरेकोे आईपीओमा लगानीकर्ताले भदौ १३ गते अर्थात आज बैकिङ समयसम्म आवेदन दिन सक्ने छन् ।कम्पनीले १२ लाख ५ हजार ३ सय २० कित्ता सेयर आईपीओ निष्काशन गरेको हो ।

कम्पनीले अंकित मूल्य १०० रुपैयाँमा १०६ रुपैयाँ प्रिमियम थपेर प्रति कित्ता २०६ रुपैयाँमा सेयर निष्काशन गरेको छ । यो कम्पनीको आईपीओमा आवेदन दिन इच्छुक लगानीकर्ताले न्युनतम १० कित्ता र अधिकतम ५० हजार कित्ताको लागि आवेदन दिन सक्ने छन् ।

कम्पनीको सेयर निष्काशन तथा बिक्री प्रबन्धकमा प्रभु क्यापिटल रहेको छ । आयोजनाले २०७५ चैत्र १८ गतेबाटै विद्युत उत्पादन शुरु गरिसकेको कम्पनीले जनाएको छ । आईपीओबाट जम्मा भएको रकमले ऋण तिर्ने कम्पनीले अर्थ कागजलाई जनाएको छ ।

कम्पनीले मकवानपुर जिल्लाको कोगटे स्थित इपामा २२ मेगावाट क्षमताको बागमती नदी जलविद्युत आयोजनाको निर्माण गरी सञ्चालन गरिरहेको छ ।

कम्पनीले यस अघि नै आयोजना प्रभावित ललितपुर र मकवानपुर जिल्लाका स्थानीय तथा श्रम स्वीकृति लिई विदेशमा रहेका नेपाली नागरिकको लागि आईपीओ निष्काशन गरि बाँडफाँट समेत गरिसकेको छ ।